Inanunsyo ng Pfizer Inc. noong ika-5 ng Nobyembre ang paglikha nila ng ‘Paxlovid’, isang tabletang panlaban sa COVID-19. Batay sa pagsusuri ng Phase 2/3 EPIC-HR o Evaluation of Protease Inhibition for COVID-19 in High-Risk Patients, makababawas ito ng 89% na tiyansa ng pagka-ospital at pagkamatay mula sa sakit. 

Ang Paxlovid, isang pinag-aaralang gamot na gawa ng Pfizer Inc., ay isang “protease inhibitor antiviral therapy” na ginawa sa anyong tableta. Ito ay agad na ibinibigay sa mga taong nakararamdam ng sintomas ng COVID-19, lalo na kapag may nakasalamuha silang taong naging positibo sa sakit. Sa pag-inom ng gamot ay maaagapan na ang komplikasyong maidudulot nito na posibleng magdulot ng pagkaka-ospital at kamatayan.

Napatunayan ito sa pagsusuring ginawa mula sa paghahambing ng mga nakatatandang pasyenteng may COVID-19 na pinainom ng Paxlovid at mga pasyenteng pinainom ng placebo. Sa overall study population ay naitala na walang pasyenteng namatay sa sakit matapos uminom ng Paxlovid sa loob ng 28 na araw. 

Samantala, ang grupo ng mga pinainom ng placebo ay nakapagtala ng 10 pasyenteng nasawi sa sakit. Patunay lamang na maganda ang epekto ng Paxlovid™ sa pagsugpo sa COVID-19.

Sinimulan ang unang pagsusuri nito noong ika-29 ng Setyembre, 2021 na kalahok ang 1219 na pasyente mula sa iba’t ibang clinical sites ng Hilaga at Timog Amerika, Europa, Aprika, at Asya kung saan 45% dito ay mga kalahok mula sa Estados Unidos. 

Ang lahat ng mga kasali ay napatunayang positibo sa SARS-CoV-2 base sa resulta ng  kanilang laboratoryo. Lahat sila ay may iba pang comorbidities na maaaring maging sanhi ng paglala ng kanilang karamdaman at ‘di kalaunan humantong sa kanilang kamatayan. 

Inirerekomenda ng isang independent data monitoring committee na nakipag-ugnayan na sa U.S. Food and Drug Administration (FDA) na itigil na ng Pfizer ang pag-aaral sa nasabing gamot dahil napatunayan na kung gaano itong ka-epektibo batay sa mga nagawang pag-aaral, at plano nang ilabas at ipagamit ito ng US FDA para sa Emergency Use Authorization (EUA). 

Nito lamang Nobyembre 17 ay pormal nang nagsumite ng Emergency Use Authorization (EUA) ang Pfizer Inc. sa U.S. Food and Drug Administration upang maaprubahan na ang paggamit ng gamot sa mga pasyente ng COVID-19. 

Kung maaaprubahan ang Paxlovid ng Pfizer, ito ang magiging kauna-unahang “oral antiviral” na gamot panlaban sa COVID-19. Kapag natapos na ang isinasagawang “EPIC clinical development program” at tuluyan nang aprubahan ang paggamit nito, maaari na itong ireseta at ipainom sa mga pasyenteng may Covid-19 upang hindi na lumala ang kanilang kondisyon. 


Para sa iba pang impormasyon tungkol sa Paxlovid, i-click ang link na ito: https://bit.ly/Paxlovidmoreinfo


Andrew Cepe // Litrato kuha sa ABC News

Leave a Reply